Onte, dúas startups impulsadas polo Business Factory Auto & Mobility (BFA), BINARIAL e Deduce Data Solutions (DDS), presentaron as súas propostas innovadoras baseadas en Intelixencia Artificial ante empresas consolidadas do ecosistema da automoción.
Durante a sesión, ambas compañías expuxeron o potencial das súas solucións tecnolóxicas para dar resposta a retos reais do sector, amosando como a análise avanzada de datos e as ferramentas de IA poden contribuír a optimizar procesos, mellorar a toma de decisións e aumentar a competitividade industrial.
Este tipo de encontros reflicten un dos principais valores diferenciais do BFA: achegar o talento emprendedor ás necesidades concretas da industria, xerando espazos de colaboración onde a innovación tecnolóxica e a experiencia empresarial se complementan e se potencian mutuamente.
A conexión directa entre startups e empresas consolidadas facilita a identificación de oportunidades de piloto, posibles colaboracións e futuros acordos comerciais, acelerando a transferencia tecnolóxica e a incorporación de novas solucións á cadea de valor.
Desde o BFA continuamos traballando para que máis tecnoloxías innovadoras cheguen ao sector, contribuíndo a construír unha industria da automoción máis competitiva, dixital e sostible.