Os proxectos participantes na 8ª edición do Business Factory Auto & Mobility (BFA) finalizaron o 23 de marzo a súa rolda de visitas a empresas tractoras e centros industriais do ecosistema CEAGA, unha iniciativa clave dentro do seu proceso de aceleración.
Ao longo das últimas semanas, os equipos tiveron a oportunidade de coñecer de primeira man a realidade produtiva do sector, afondando nos procesos industriais, nos estándares de calidade e nos principais retos tecnolóxicos aos que se enfronta actualmente a industria da automoción e mobilidade.
As visitas desenvolvéronse en empresas e centros de referencia como COPO, OPmobility nas súas plantas de Redondela e Vincios, AutoLAB, Serveo, LEAR, Stellantis Vigo, SMRC, DENSO, MAIER e BENTELER, todas elas actores estratéxicos dentro da cadea de valor do sector en Galicia.
Durante estas xornadas, os proxectos puideron contrastar as súas solucións coas necesidades reais da industria, identificar oportunidades de colaboración e explorar posibles pilotos en contornos industriais. Este contacto directo con empresas consolidadas permitiu aos equipos comprender mellor os requisitos técnicos, organizativos e operativos que esixe o mercado.
A rolda de visitas forma parte do modelo diferencial do BFA: conectar startups coa industria desde as primeiras fases do programa, facilitando un contorno real onde validar tecnoloxías, axustar propostas de valor e acelerar a súa integración na cadea de subministración.
Máis alá da aprendizaxe técnica, estas xornadas reforzan un dos principais obxectivos do programa: xerar oportunidades reais de colaboración, impulsar o desenvolvemento de probas piloto e favorecer a incorporación de solucións innovadoras ao ecosistema industrial galego.