Os proxectos participantes na 8ª edición do Business Factory Auto & Mobility (BFA) finalizaron o Programa Avanzado en Management, unha formación estratéxica que acompañou aos equipos desde setembro de 2024 e que concluíu o 21 de xaneiro de 2025 co acto de clausura e entrega de diplomas.
O programa, desenvolvido en colaboración con IE Business School, estivo dirixido aos proxectos en fase de aceleración e consolidación, co obxectivo de complementar o seu desenvolvemento tecnolóxico cunha sólida base en dirección e xestión empresarial.
Durante estes meses, os equipos reforzaron as súas competencias estratéxicas, directivas e comerciais, fundamentais para afrontar os retos do crecemento nun sector tan esixente como o da automoción e mobilidade.
Ao longo de 45 sesións distribuídas en 15 xornadas, os participantes traballaron áreas clave como liderado e xestión de equipos, estratexia empresarial, transformación dixital, dirección comercial e marketing, sistemas de xestión e control, negociación, comunicación e análise macroeconómica.
A metodoloxía, baseada no método do caso e nun enfoque eminentemente práctico, permitiu aos equipos contrastar os seus modelos de negocio con situacións reais, compartir experiencias e aplicar ferramentas de xestión directamente aos seus propios proxectos.
O acto de clausura contou coa participación de Carola Arboli, en representación de IE Business School, e de Juan José Areal, en representación de Stellantis, quen fixeron entrega dos diplomas aos participantes e destacaron a importancia de combinar excelencia tecnolóxica e capacidade de xestión para consolidar empresas innovadoras no ecosistema industrial.
Con esta formación, o BFA reafirma a súa aposta por un modelo de aceleración integral que combina innovación, conexión coa industria e capacitación directiva, elementos clave para impulsar startups sólidas e competitivas no sector da automoción e mobilidade.