Comeza a quinta edición do BFA

Xa está en marcha unha nova edición da iniciativa Business Factory Auto (BFA), que arrincou onte a súa quinta promoción cunha xornada de apertura, onde participaron os 20 novos proxectos seleccionados.

Nesta sesión de benvida, que se celebrou de maneira telemática, os participantes fixeron unha breve presentación do seu proxecto para poder analizar posibles sinerxias ou posibilidades de colaboración. Ademais, tiveron a oportunidade de coñecer con máis detalle as facilidades que poden obter do seu paso pola aceleradora, como un espazo de traballo, respaldo financeiro, formación e un ecosistema único integrado por titores, mentores, partners e outros axentes relacionados co sector de automoción.

Os proxectos participantes finalizarán a súa estancia na aceleradora os próximos meses de agosto (aceleración) e decembro (consolidación).

A iniciativa Business Factory Auto está impulsada pola Xunta de Galicia, o Consorcio da Zona Franca de Vigo, Groupe PSA e CEAGA, co obxectivo de identificar, acelerar e consolidar proxectos especializados en automoción e transformalos en empresas innovadoras viables e escalables que atraian e reteñan talento.